 Ljósmynd/Bára Kristinsdóttir Á nýliðnum aðalfundi Dýraverndarsambandsins var veitt viðurkenningin Dýraverndari ársins fyrir ötult starf í þágu velferðar dýra. Dýraverndari ársins 2023 er Arndís Björg Sigurgeirsdóttir, fyrrum formaður og einn af stofnendum dýraverndunarfélagsins Villikatta. Dýraverndari ársins er einstök kona, sem er allt í senn dýravinur, hugrökk, áræðin, framsýn og viljasterk. Meðal annars vegna þessara eiginleika stofnaði hún félagið Villikettir. Sú áræðni að stofna félag til bjargar villi- og vergangsköttum á Íslandi sýnir hug og þor einstaklings sem fer ótroðnar slóðir. Arndís Björg hefur sýnt það og sannað að mikil þörf var á félagi í þágu þessara katta en félagið hefur allt frá stofnun þess komið hundruðum katta til bjargar. Umræða og viðhorf yfirvalda var fyrir tilkomu félagsins neikvæð gagnvart heimilislausum kisum og leiddi þetta viðhorf til ómannúðlegra útrýmingarherferða eins og segir á vef félagsins Villikatta. Mikið hefur áunnist í þágu velferðar þessara dýra af hálfu félagsins þau tíu ár sem það hefur starfað. Framsýni og viljastyrkur Arndísar Bjargar með stofnun félagsins Villikettir og stofnun deilda um allt land ásamt samstarfi við sveitarfélög um björgun villi- og vergangskatta með TNR aðferðinni (fanga-gelda-skila) er einstakt afrek. Jákvætt viðhorf og aukin meðvitund almennings gagnvart mannúðlegri meðferð villikatta hefur aukist til muna og fjölda villtra dýra fækkað vegna kraftmikils starfs Villikatta. Það er mikill heiður fyrir Dýraverndarsamband Íslands að veita Arndísi Björgu Sigurgeirsdóttur viðurkenninguna Dýraverndari ársins 2023, hún er sannarlega vel að henni komin!  Þann 9. maí sl. rann út frestur fyrir fullgilda félaga í DÍS að bjóða sig fram til stjórnarsetu í sambandinu. Þau sæti sem kosið skal um á komandi aðalfundi þann 16. maí eru sæti ritara, gjaldkera og meðstjórnanda til tveggja ára og sæti meðstjórnanda til eins árs. Eitt framboð barst í hvert sæti. Eftirfarandi framboð bárust til stjórnarsetu í DÍS. Sitjandi meðstjórnandi Sigursteinn R. Másson gefur kost á sér til áframhaldandi stjórnarsetu í sæti meðstjórnanda til eins árs. Framboð í sæti ritara til tveggja ára Ágúst Ólafur Ágústsson Ágúst Ólafur Ágústsson er lögfræðingur og hagfræðingur. Ágúst er fyrrverandi alþingismaður þar sem hann tók ítrekað upp á vettvangi Alþingis málefni dýra og dýraverndar. Dæmi um atriði sem Ágúst tók upp á þingi má sjá í meðfylgjandi grein. Ágúst hefur unnið hjá Sameinuðu þjóðunum í New York, verið efnahagsráðgjafi forsætisráðherra, setið í bankaráði Seðlabanka Íslands, verið formaður Evrópunefndar forsætisráðherra og framkvæmdasjóðs aldraða ásamt því að vera formaður Barnanefndar um stöðu barna í mismunandi fjölskyldugerðum svo eitthvað sé nefnt. Þegar Ágúst sat á Alþingi var hann m.a. formaður viðskiptanefndar Alþingis, varaformaður fjárlaganefndar og allsherjarnefndar ásamt því að vera í Íslandsdeild Alþjóðaþingmannasambandsins. Undanfarin misseri hefur Ágúst Ólafur unnið sem kennari við Háskóla Íslands, verið sjálfstæður ráðgjafi og stundað doktorsnám í opinberri stjórnsýslu við Háskóla Íslands. Í fyrra vann Ágúst ítarlega úttekt fyrir Dýraverndarsamband Íslands um bætt eftirlit með dýravelferð á Íslandi. Framboð í sæti meðstjórnanda til tveggja ára Þóra Hlín Friðriksdóttir Þóra Hlín Friðriksdóttir heiti ég og sæki hér með um aðild í stjórn Dýraverndarsambands Íslands og heiti því að leggja mig fram af heillindum og vera sterkur málsvari hinna màllausu. Ég er fædd 7. febrúar árið 1980 og ólst upp á Dalvík. Ég er í sambúð og bý á Kàrsnesi ásamt golden retriever hundinum Herkúles. Ég er hjúkrunarfræðingur og sjúkraliði að mennt ásamt því að hafa kennt yoga og leitt hugleiðslu viðburði til margra ára. Ég lagði stund á hestamennsku fram á fullorðinsár og hafa dýravelferðamál alla tíð verið mér ofarlega í huga. Framboð í sæti gjaldkera til tveggja ára María Lilja Tryggvadóttir Ég, María Lilja Tryggvadóttir býð mig fram í stöðu gjaldkera hjá Dýraverndarsambandi Íslands (DÍS) til tveggja ára. Ég er menntuð sem viðskiptafræðingur frá Háskólanum á Bifröst, hef setið í ýmsum nefndum og stjórnum í bæði skóla og vinnu, t.d í Umhverfisráði framhaldsskólans í Mosfellsbæ þar sem mér er einnig mjög annt um umhverfið okkar. Ég er alin upp í sveit, umkringd öllum tegundum af dýrum. Þar hef ég orðið vitni að ýmsum ófögrum atburðum sem sitja í mér enn þann daginn í dag. Eftir að ég flutti til Reykjavíkur hef ég tekið að mér aldraða hunda. Mér er mjög annt um heilsu dýra, bæði andlega og líkamlega og tel að við getum gert margt til að bæta heilsu þeirra til muna. Ég tók að mér gamlan Labrador hund 2022. Torres gamli var á 13 ári þegar hann kom til mín þjakaður af gigt og í ofþyngd. Með réttu matarræði og fæðubótarefni umbreyttist hann og lifði til 15 ára aldurs. Í lok desember mánaðar 2023 bættist svo einn annar gamall hundur við fjölskylduna okkar. Lalli er 10 ára gamall og hefur gengið í gegnum ömurlega hluti á sinni ævi. Á stuttum tíma hefur hann komið út úr skelinni sinni og farið þvílíkum framförum. Hvort sem það eru gæludýr, búdýr eða villt dýr, þá eiga málleysingjarnir rétt á góðri meðferð, og eiga að njóta vafans. Það er á ábyrgð okkar að tala fyrir þá sem geta ekki talað, aðstoðað þá sem þurfa á hjálp að halda og að berjast fyrir betri réttindum fyrir þeim sem þurfa á því að halda. Ég brenn fyrir bættri velferð og ég er viss um það með mínu framlagi til þessa góða sambands, geti ég beitt mér fyrir áframhaldandi starfi fyrir dýrin okkar. Ég hef séð að þrátt fyrir að DÍS sé ekki með framkvæmdarvald, þá er það sambandið sem fólk snýr sér að þegar neyðin er mest, þegar fjölmiðlar vilja svör og þegar ábyrgar stofnanir hafa brugðist hlutverki sínu. Höldum áfram að þrýsta á ábyrgðaraðilana, fáum svörin og vinnum að bættri framtíð fyrir okkur öll. Að berjast fyrir dýravelferð er mér hjartans mál og vona að ég fái tækifæri til að leggja mitt af mörkum sem meðlimur í stjórn Dýraverndarsambands Íslands. Lagabreytingatillögur Þann 9. maí rann einnig út frestur fyrir fullgilda félaga að senda inn lagabreytingartillögur. Engar lagabreytingatillögur bárust. Við hvetjum fullgilda félaga til að mæta á aðalfundinn fimmtudaginn 16. maí kl 17:00 í húsnæði Hjálpræðishersins að Suðurlandsbraut 72, 108 Reykjavík og hafa áhrif á störf DÍS. Stjórn DÍS  Ljósmynd/Steinunn Árnadóttir Ástand dýra á bænum Höfða í Þverárhlíð í Borgarbyggð er grafalvarlegt. Sauðféð er í miklum vanhöldum og er það að hluta komið út fyrir girðingar þar sem engin beit er við bæinn. Ærnar eru margar að bera án eftirlits sem er brot á reglugerð 1066/2014 um velferð sauðfjár og geitfjár. Nýborin lömb eru að finnast dauð og deyjandi á svæðinu úr vosbúð. Sauðféð er jafnframt margt orðið veikt og ein ær hefur fundist dauð. Um er að ræða mál þar sem dýr hafa verið látin þjást árum saman meðan málið er í ferli hjá yfirvöldum sem tryggja ekki velferð þessara dýra. Stjórn Dýraverndarsambandsins (DÍS) hefur haft samband við Matvælastofnun (MAST) vegna málsins sem segir málið í ferli. Um er að ræða dýr í sárri neyð og verður stofnunin að bregðast við án tafar. MAST er hér ekki að sinna lögbundnu hlutverki sínu að verja velferð dýra og hefur DÍS sent ábendingu þess efnis til umboðsmanns Alþingis. Að MAST sem ein fer með eftirlit með velferð dýra í landinu bregðist hér lögbundnu hlutverki sínu gagnvart dýrum í neyð er alvarlegt mál. Í stjórnsýsluúttekt ríkisendurskoðunar um eftirlit MAST með velferð búfjár segir m.a. að nálgun stofnunarinnar sé í sumum tilfellum svo varfærnisleg að hún gangi í raun gegn markmiðum laga 55/2013 um velferð dýra. Það er lagaleg skylda MAST að koma dýrum í neyð til bjargar, það er ekki síður siðferðisleg skylda samfélagsins alls. Það er ákall frá stjórn DÍS að dýrunum að bænum Höfða í Þverárhlíð verði tafarlaust komið til bjargar og lífs með því að yfirvöld bregðist við. Málið þolir enga bið, í húfi er velferð, líf og heilsa dýranna á Höfða. Stjórn Dýraverndarsambands Íslands  Aðalfundur Dýraverndarsambands Íslands (DÍS) verður haldinn fimmtudaginn 16. maí kl 17:00-19:00 í húsnæði Hjálpræðishersins að Suðurlandsbraut 72, 108 Reykjavík. Húsið opnar 16:30. Dýraverndari ársins Á aðalfundinum verður veitt viðurkenning DÍS, Dýraverndari ársins.Viðurkenningin er veitt fyrir ötult starf í þágu velferðar dýra. Dýraverndari ársins er Arndís Björg Sigurgeirsdóttir. Arndís er einn af stofnendum dýraverndunarfélagsins Villikatta og er fráfarandi formaður félagsins. Hún hefur unnið ötult og ómetanlegt starf í þágu velferðar villikatta undanfarin tíu ár. Dagskrá aðalfundar DÍS
Í stjórn DÍS sitja sex manns. Á aðalfundi 2024 verður kosið um ritara, gjaldkera og meðstjórnanda, til tveggja ára og meðstjórnanda til eins árs. Samkvæmt lögum sambandsins geta aðeins fullgildir félagar sótt aðalfund og gefið kost á sér til stjórnar, þ.e. hafa verið orðnir félagar í DÍS fyrir síðasta aðalfund árið 2023. Félagar sem hafa ekki greitt félagsgjald fyrir árið 2024 verða að greiða fyrir aðalfund til að geta setið fundinn og verið kjörgengir. Þeir félagar sem eru Dýraverndarar greiða ekki árlegt félagsgjald, félagsgjaldið telst innifalið. Framboð til stjórnar og lagabreytingartillögur þurfa að berast í síðasta lagi fimmtudaginn 9. maí á netfangið [email protected] og verður kynnt á heimasíðu DÍS laugardaginn 11. maí. Framboðstilkynningu þarf að fylgja kynningartexti, 100-200 orð ásamt upplýsingum um til hvaða stjórnarsætis er boðið fram. Við hvetjum félaga til að mæta og hafa áhrif á störf DÍS. Stjórn DÍS |
DÝRAVERNDARSAMBAND ÍSLANDS | [email protected]