Yfirlýsing DÍS vegna minka sem var sleppt frá loðdýrabúi í Mosfellsdal
31. júlí 2026
Það er alvarlegt dýravelferðarmál að minkum hafi verið sleppt frá loðdýrabúi í Mosfellsdal. Minkar eru afkastamikil rándýr og getur sá mikli fjöldi dýra sem var sleppt valdið verulegum skaða á lífríki svæðisins, ekki síst fuglalífi.
Þessi verknaður varðar einnig velferð minkanna sjálfra þar sem dýr sem hafa verið alin innandyra geta reynst bjargarlaus í náttúrunni.
Dýraverndarsamband Íslands tekur undir hvatningu Matvælastofnunar og hvetur dýraeigendur til að gæta öryggis þeirra dýra sem gæti stafað hætta af minknum. Jafnframt er fólk hvatt til að fara ekki á svæðið í þeim tilgangi að taka þátt í leit eða föngun minkanna. Sú vinna er alfarið á ábyrgð og á vegum fagaðila sveitarfélagsins.
Nauðsynlegt er að aðgerðir vegna minkanna fari fram á mannúðlegan hátt og að aflífun þeirra, þar sem hún reynist óhjákvæmileg, sé framkvæmd í samræmi við lög um velferð dýra.
Lögregla rannsakar nú málið og enn sem komið er hefur ekki verið staðfest hver stendur að baki verknaðinum eða í hvaða tilgangi hann var framinn.
Dýraverndarsambandið vill árétta að hafi verið um að ræða aðgerð í nafni dýravelferðar skaðar slíkt aðeins málstað dýra. Sambandið styður ekki slíka nálgun.
