Framboð til stjórnar DÍS og lagabreytingatillögur á aðalfundi 2026
14. maí 2026
Nú styttist í aðalfund Dýraverndarsambands Íslands sem haldinn verður miðvikudaginn 20. maí kl. 17-19 í húsnæði Eignaumsjónar Suðurlandsbraut 30, 108 Reykjavík.
Gengið er inn fyrir aftan bygginguna, af 2. hæð í bakhúsinu og inngangur er beint af efra bílastæðinu. Húsið opnar 16:45.
Eftirfarandi eru upplýsingar um þau framboð til stjórnar og þær lagabreytingartillögur sem bárust.
Eftirfarandi framboð bárust til stjórnarsetu í DÍS
Sitjandi gjaldkeri María Lilja Tryggvadóttir gefur kost á sér til áframhaldandi stjórnarsetu í sæti gjaldkera til tveggja ára.
Framboð í sæti ritara til tveggja ára
Adelina Antal
Ég sæki hér með um sæti ritara í stjórn Dýraverndarsambands Íslands.
Frá því ég man eftir mér hefur mér fundist skrítið hvernig við komum fram við dýr. Nú er ég 37 á árinu og er engu nær að skilja það. Ég vona að ég geti lagt þessu frábæru samtökum lið á einhvern hátt og hlakka til að taka þátt í starfinu.
Síðustu 10 ár hef ég unnið í sjónvarpsgeiranum, fyrst á Stöð2 og svo núna á RÚV, við framleiðslu á alls kyns sjónvarpsefni. Ég með diplómu í ljósmyndun og kvikmyndagerð, BA í listfræði og hálfa MA gráðu í menningarmiðlun sem ég stefni á að klára einn daginn. Ég hef áður setið í stjórn Samtaka grænkera á Íslandi í eitt ár en hætti vegna anna.
Nú er ég spennt fyrir því að kynnast frekar starfi Dýraverndarsambands Íslands og því frábæra fólki sem vinnur svo þarfa vinnu þar.
Framboð í sæti meðstjórnanda til tveggja ára
Óskar Halldór Valtýsson
Ég heiti Óskar Halldór Valtýsson og býð mig fram í embætti meðstjórnanda í stjórn Dýraverndarsambands Íslands.
Ég hef fylgst náið með dýravelferðarmálum undanfarna tvo áratugi og tel að enn sé margt óunnið, þrátt fyrir að mál hafi þróast í rétta átt á síðustu árum. Hef brennandi áhuga á að leggja mitt af mörkum til þess góða starfs sem unnið er innan Dýraverndarsambands Íslands.
Ég hef starfað mestallan minn starfsferil innan fjarskipta- og raforkugeirans, lengst af sem fjarskiptastjóri Landsvirkjunar. Er stofnandi og meðeigandi nýsköpunarfyrirtækisins Laka Power og starfa þar sem tækniþróunarstjóri. Ég er skráður fyrir nokkrum alþjóðlegum einkaleyfum á sviði rafeinda- og orkunámstækni.
Ég er giftur, á fimm börn og fjölda barnabarna. Á heimilinu eru nú fjórir hundar, en þeir hafa mest verið sex á sama tíma.
Lagabreytingatillögur
Þann 12. maí rann einnig út frestur til að senda inn tillögur að breytingum á lögum félagsins. Tvær tillögur bárust frá stjórn Dýraverndarsambandsins.
Lagabreytingartillaga 1: Skuldbindingar DÍS
Í dag er 3. gr. um skuldbindingar sambandsins eftirfarandi:
Sambandið tekur að sér eftirtaldar skuldbindingar:
a) að tilnefna einn fulltrúa til þriggja ára í fagráð um velferð dýra samkvæmt lögum númer 55/2013 um velferð dýra.
b) að tilnefna allt að þrjá fulltrúa í Norræna Dýravelferðarráðið skv. samþykktum þess.
c) að tilnefna tvo fulltrúa í stjórn Sauðfjárverndarinnar kt. 550269-4659.
d) að tilnefna þrjá fulltrúa í stjórn Minningarsjóðs Peders J. Steffensen kt. 680602-3950.
e) að tilnefna þrjá fulltrúa í stjórn Tækjakaupasjóðsins „Dýrin mín stór og smá“ kt. 691298-4349.
f) að annast vörslu Sólskríkjusjóðsins kt. 600397-2149.
Sambandið skal starfrækja skrifstofuaðstöðu eftir því sem aðstæður leyfa og henta starfseminni á hverjum tíma.
Lagt er til að g-lið verði bætt við sem orðist svo:
g) að annast reglubundna umhirðu og viðhald á leiði Ingunnar Einarsdóttur stofnanda sambandsins.
Lagabreytingartillaga 2: Ráðning starfsfólks
Í dag er 6. gr. um ráðingu starfsfólks eftirfarandi:
Stjórn getur ráðið framkvæmdastjóra og/eða starfsmann til að sjá um daglega umsýslu sambandsins. Framkvæmdastjóri og/eða starfsmaður situr stjórnarfundi sambandsins eftir því sem við á.
Lagt er til að hún orðist svo:
Stjórn getur ráðið framkvæmdastjóra eða starfsmann til að annast daglega umsýslu sambandsins. Framkvæmdastjóri og/eða starfsmaður situr stjórnarfundi eftir ákvörðun stjórnar og hefur þar málfrelsi og tillögurétt en ekki atkvæðisrétt.
Stjórnarmenn geti verið starfsmenn sambandsins í hlutastarfi og þá aðeins ef stjórn er einróma samþykk því.
