12. febrúar 2026
Dýraverndarsamband Íslands hefur ásamt fimmtán alþjóðlegum dýraverndarsamtökum sent framkvæmdastjórn Evrópusambandsins bréf þar sem þess er krafist að hormónaefnið PMSG verði bannað í Evrópu. Efnið sem unnið er úr blóði fylfullra hryssna er notað sem frjósemislyf og aðallega gefið svínum í þauleldi.
Í bréfinu er vakin athygli á nýlegri rannsókn dýraverndarsamtakanna Animal Welfare Foundation (AWF) og Tierschutzbund Zürich (TSB) á blóðmerabúum í Argentínu og Úrúgvæ en þetta eru sömu samtök og gerðu rannsókn á blóðmerabúum á Íslandi.
Orðin tóm
Úttekt þeirra á búunum í Suður-Ameríku sýnir að aðbúnaður dýranna er skelfilegur og hefur síst skánað frá því að sömu samtök afhjúpuðu starfsemina fyrir tíu árum. Uppljóstrunin vakti heimsathygli á þeim tíma og í kjölfarið lofuðu yfirvöld í löndunum sem og fyrirtækin sem ráku blóðmerabúin bót og betrun.
Nú hefur komið í ljós að loforðin voru orðin tóm.
Ný rannsókn AWF og TSB sem stóð yfir á árunum 2023 til 2025 leiðir meðal annars í ljós að starfsmenn búanna í Argentínu og Úrúgvæ beita hryssurnar ofbeldi. Fylfullar hryssurnar eru neyddar inn í þröngar stíur þar sem þær eru bundnar niður og tekið úr þeim blóð. Þær streitast á móti og sparka í básana sem oft leiðir til þess að þær meiðast. Myndband frá búunum fylgir skýrslunni en einnig er hægt að horfa á það á Youtube.
Í bréfinu til framkvæmdastjórnar Evrópusambandsins sem DÍS, Eurogroup for Animals og fleiri dýraverndarsamtök skrifa undir er farið í stuttu máli yfir helstu niðurstöður rannsóknar AWF og TSB á blóðmerabúunum í Suður-Ameríku.
Nýttu glufur í regluverki ESB
Í bréfinu er greint frá því að rannsókn AWF og TSB hafi leitt í ljós að argentínska fyrirtækið Syntex og dótturfélag þess í Úrúgvæ sem reka blóðmerabúin hafi fundið glufu í regluverki ESB eftir að hafa árið 2018 glatað öllum evrópsku viðskiptavinunum sem keypt höfðu af þeim PMSG. Syntex setti árið 2020 á laggirnar fyrirtæki sem er með höfuðstöðvar í Írlandi og getur nú dreift hormónaefninu til annarra Evrópulanda.
Dýraverndunarsamtökin segja í bréfinu að eina leiðin til koma í veg fyrir að fyrirtæki nýti glufur í reglunum og haldi þar með áfram að níðast á dýrum sé að leggja blátt bann við notkun á PMSG í Evrópu.
Hér má lesa bréf dýraverndarsamtakanna til framkvæmdastjórnar ESB.
