Stjórn DÍS ákvað síðastliðið haust að láta skoða reynslu af eftirliti með velferð búfjár. Stjórn DÍS fól Ágústi Ólafi Ágússyni lögfræðingi og hagfræðingi að vinna slíka úttekt fyrir sambandið ásamt því að skoða beitingu viðurlaga, fjölda kæra og afdrif þeirra í réttarkerfinu. Hér má finna skýrsluna: Bætt dýravelferð - Staða og tillögur til úrbóta Bætt dýravelferð - Ný úttekt um stöðu og framtíð dýravelferðar á Íslandi verður kynnt á opnu málþingi í Öskju, Sturlugötu 7, 102 Rvk, þriðjudaginn 14. mars klukkan 17:00-19:00. Svandís Svavarsdóttir matvælaráðherra setur málþingið og síðan mun Ágúst Ólafur Ágústsson lögfræðingur og hagfræðingur kynna úttektina sem hann hefur unnið fyrir Dýraverndarsamband Íslands (DÍS). Þá verða pallborðsumræður með virkri þátttöku gesta í sal en í pallborði sitja auk skýrsluhöfundar fulltrúar matvælaráðuneytis, Matvælastofnunar og Dýraverndarsambands Íslands. Skráning hér. Bein útsending verður frá málþinginu, á eftirfarandi hlekk: https://eu01web.zoom.us/j/61580201568 Dagskrá Stjórnandi málþings er Sigursteinn R. Másson rithöfundur og fjölmiðlamaður. Kl 17:00 Opnunarávarp - Svandís Svavarsdóttir matvælaráðherra Kl 17:05 Ávarp - Linda Karen Gunnarsdóttir formaður DÍS Kl 17:10 Kynning - Ágúst Ólafur Ágústsson lögfræðingur og hagfræðingur kynnir niðurstöður skýrslunnar - Bætt dýravelferð Kl 17:30 Hlé Kl 17:35 Pallborð ræðir skýrsluna með áherslu á tillögur hennar og næstu skref
Mætum öll í Öskju þriðjudaginn 14. mars klukkan fimm og tökum þátt í að móta bætt eftirlit með dýravelferð á Íslandi! Dýraverndarsamband Íslands Í tilefni af fréttum um kettlinga sem fundust dánir í læk á Eskifirði sl. laugardag vill Dýraverndarsamband Íslands benda á að bannað er með lögum um velferð dýra, nr. 55/2013, að drekkja dýrum. Slíkt felur í sér óheyrilega grimmd. Dýralæknum er einum heimilt að aflífa gæludýr, nema í neyðartilfellum þegar fullreynt er að ekki næst í dýralækni og ætla má að sjúkdómur dýrs eða meiðsl valdi dýrinu óbærilegum kvölum eða séu banvæn. Dýraverndarsamband Íslands fordæmir allt dýraníð. Þessi vetur hefur reynst villtum fuglum sérlega erfiður, en frosthörkur hafa verið óvenjulega miklar og langvarandi. Fjöldi fugla hefur drepist vegna þess að þeir hafa ekki komist í fæðu og margir þeirra glíma nú við máttleysi sökum hungurs og kulda. Á höfuðborgarsvæðinu eru grágæsir sérlega illa staddar því þær eru háðar fóðurgjöfum þegar jarðbönn eru slík að þær geta ekki komist í beit á túnum og grasflötum. Öfugt við endur og álftir ná þær ekki í fæðu í fjöruna og grunnsævið. Gæsirnar er sérstakur stofn, svokallaðar Reykjavíkurgæsir, sem halda sig allt árið á höfuðborgarsvæðinu og leggjast ekki í far öfugt við gæsir annars staðar (flestar grágæsir fara til Bretlands og Írlands). Þessi stofn varð til eftir miðja síðustu öld og eru nú um 1000 fullorðnir fuglar í honum (upplýsingar fengnar frá Ólafi Karli Níelsen formanni Fuglaverndar og Arnóri Sigfússyni fuglafræðingi). Dýraverndarsamband Íslands vill hvetja öll sveitarfélög að koma villtum fuglum og öðrum dýrum sem nú eru í neyð vegna veðráttunnar til hjálpar með fóðurgjöf þar til hlýnar. Minnt er á 7 gr. laga um velferð dýra nr. 55/2013, þar sem segir um hjálparskyldu: Þeim sem verður var við eða má ætla að dýr sé sjúkt, sært, í sjálfheldu eða bjargarlaust að öðru leyti ber skv. lögum að veita því umönnun eftir föngum. Viðkomandi sveitarfélagi er skylt að sjá til þess að gripið sé til aðgerða sé um hálfvillt eða villt dýr að ræða. Dýraverndarsamband Íslands |