|
Eftirfarandi umsögn var send til Alþingis frá stjórn DÍS 17. janúar 2022, skv umsagnarbeiðni. Umsögnin var unnin og samþykkt af stjórn DÍS að venju. Það er áríðandi að velferð dýra sé höfð í öndvegi við alla meðferð á þeim og sérlega áríðandi þegar um er að ræða ífarandi aðgerðir:
Umsögn Dýraverndarsambands Íslands, blóðtaka úr stóðhryssum, 15. mál, 152. löggjafarþing, umsagnarbeiðni 11637 Dýraverndarsamband Íslands tekur afstöðu til dýrahalds á grundvelli velferðar dýranna. Velferð dýra telst ógnað þegar lágmarksviðmiðmum laga um velferð dýra (55/2013) er ekki náð og miðast við að dýr séu laus við vanlíðan, hungur og þorsta, ótta og þjáningu, sársauka, meiðsli og sjúkdóma sem skyni gæddar verur og að þau geti sýnt sitt eðlilega atferli eins og frekast er unnt. Stóðhrossahald: Stóðhrossahald telst sem slíkt að mati DÍS við eðlilegar forsendur almennt halda þessi viðmið á Íslandi, hrossin eru haldin úti við við náttúrulegar aðstæður sem þeim eru eðlislægar enda hánorræn hestategund með uppruna frá mun kaldari svæðum en á Íslandi. Hrossin fá að fjölga sér á náttúrulegan hátt miðað við sitt eðli og árstíðir. Stóðhrossin geta þannig í sínu náttúrulega umhverfi sýnt eðlislægt atferli sem félagsdýr í stöðugum aðstæðum innan hóps þar sem hrossin þekkjast. Eðlilegar forsendur eru að hrossin búi við góðan aðbúnað, skjól- og landrými, aðgang að góðu vatni og nægri beit árið um kring, en fái útigjöf við jarðbönn. Við þær aðstæður er líklegt að hross séu það búfé sem býr við hvað bestan kost á Íslandi miðað við áðurtalin viðmið um velferð. Meðferð hrossa: Öll hross þurfa að vera sem kallað er bandvön til að geta þolað með góðu móti að vera tekin í tökubása, sem er nauðsynlegt út frá velferð m.a vegna hófhirðu, ormalyfjagjafar, sónarskoðunar o.fl. Hryssur sem tekið er blóð þurfa með sama hætti og önnur hross að ráða við að fara í slíka tökubása án þess að fyllast meiri ótta eða streitu en eðlilegt er við annríki og nauðsynlegt er að þeim sé kennt það án ofbeldis. Aðbúnaður og aðstæður þurfa að vera miðuð við slysahættu og velferð. Aðfarir manna þurfa að vera hófstilltar og hryssunum sýnd virðing, tillitssemi og ábyrgð. Þetta eru almenn viðmið lágmarksvelferðar í meðferð hrossa og annars búfjár. Blóðtaka: blóðtakan hefur verið stunduð hér á landi í áratugi en engar óháðar, rýndar rannsóknir eru til um blóðtöku úr fyljuðum hryssum við stóðhrossahald. DÍS fordæmir harðlega að slík blóðtaka sé stunduð án þess að fyrir liggi ítarleg rannsókn á velferð hryssanna og folalda þeirra og telur ótækt að miða við rannsóknir á öðrum dýrum en hryssunum sjálfum og við þær aðstæður sem blóðið er tekið. Umsögn: DÍS telur eðlilegt að miða við eftirfarandi kröfur: 1. Að stóðhrossahald miðist við landgæði og aðstæður, bjargráð séu fyrir hendi og óháð eftirlit. 2. Að hross sem höndlað er með hvort sem það er árið um kring eða nokkrum sinnum á ári séu hið minnsta bandvön og kunni að fara í tökubása án verulegs ótta eða streitu. Áskilin er nærgætin nálgun manna og jákvæð skilyrðing fremur en neikvæð. 3. DÍS gerir skýlausa kröfu um, ef blóðtaka verður ekki bönnuð, að óháð og rýnd rannsókn verði án tafa gerð á velferð hryssa strax við næstu blóðtöku. Áskilið er að enginn vafi verði á að velferð hryssanna sé ekki ógnað með blóðtöku enda verði hún annars bönnuð. Vegna þess hvað blóðtaka er djúpt inngrip í líkama dýra þarf slík rannsókn að miðast einnig við atferli og framgang hryssanna og folalda þeirra en ekki aðeins blóðgildi. Jafnframt telur DÍS nauðsynlegt af sömu ástæðum að blóðtakan sé tekin upp á myndbönd sem eru tiltæk eftirlitsaðilum, svo og rekstur að og slepping frá tökubásum. Óháð eftirlit þarf að vera til staðar. Loks telur DÍS nauðsynlegt að viðeigandi ákvæði verði sett í lög um velferð dýra sem geri kleift að setja ítarlega reglugerð um þennan tiltekna búskap ef hann verður leyfður, þar eð um ífarandi aðgerðir er að ræða. Unnið og samþykkt af stjórn DÍS 17. janúar 2022 f.h. DÍS, Hallgerður Hauksdóttir formaður Hér er hlekkur umsögnina á vef Alþingis Comments are closed.
|