Óheimil notkun á titli tímarits Dýraverndarsambandsins

2/9/2015

Gamla myndmerkið. Tímaritið var gefið út með þessu merki fyrstu 69 árin og félagið hefur einkaleyfi á notkun þess og á orðmyndinni Dýraverndarinn til útgáfu efnis um málefni dýra.

Er rétt að gefa með villandi hætti til kynna að maður skrifi í nafni félagasamtaka? Við teljum ekki. Dýraverndarsamband Íslands hóf árið 2012 endurútgáfu á tímariti félagsins, Dýraverndaranum, en félagið stofnaði til blaðsins árið 1915. Tímaritið er málgagn dýravina á Íslandi og allir sem láta sig velferð dýra varða geta sent greinar í það. Skilvísir félagsmenn DÍS fá blaðið sent heim og er það innifalið í félagsgjöldum.

Um allnokkra hríð hefur annar aðili notað titil tímaritsins til að kynna skoðanir sínar og atvinnutengda sérfræðiþekkingu á málefnum dýraverndar á netinu (bæði með heimasíðu og á fésbókarsíðu) og hefur það valdið ruglingi og vanda fyrir félagið. Maðurinn var bréflega beðinn um að láta af þessari notkun fyrir ríflega ári síðan en hann neitaði. Var þá hafist handa við að fá skráð einkaleyfi á þessu gamla heiti hjá Einkaleyfastofu, enda nauðsynlegt að verja eigur og orðspor félagsins. Nú þegar það er fengið, hefur félagið aftur ritað manninum bréf og beðið hann að virða rödd félagsins, leggja af villandi notkun á henni og skapa sér sína eigin. Hann neitar enn og einsýnt er að félagið neyðist til að taka til varna með lögformlegum hætti.

Stjórn DÍS harmar að þurfa að verja tíma og kröftum félagsins til þessa en sér engan annan kost, enda ber okkur skylda til að verja eigur félagsins. Við viljum gjarnan verja tíma okkar í að starfa að vernd og velferð dýra og biðjum því þennan aðila enn að láta af notkun þessa titils. Þrátt fyrir afsvar mannsins við bréfi sem hann fékk sent nú í ágúst, vonum við enn að hann virði sögu og orðspor félagsins, afhendi félaginu lénið með heiti tímaritsins og láti af notkun orð- og myndmerkis þess, en skapi sér sitt eigið nafn til þess að starfa að velferð dýra.

Forsíða 2015 heftis Dýraverndarans. Þarna má sjá nútímaútgáfu myndmerkisins tímaritsins.

Hér að neðan má lesa afrit af bréfi DÍS til mannsins:

Reykjavík 28. ágúst 2015

Efni: Beiðni um að leggja af notkun á nafni tímarits Dýraverndarsambandsins.

Dýraverndarsamband Íslands stofnaði til tímaritsins Dýraverndarans árið 1915 og var það gefið út óslitið í 69 ár, en þá varð hlé á útgáfu. Félagið hóf aftur útgáfu tímaritsins árið 2012.

Tímaritið er á vegum og í eigu DÍS. Við vekjum athygli þína á að Dýraverndarsamband Íslands hefur einkaleyfi til að nota nafnið Dýraverndarinn og myndmerki þess. Einkaleyfin eru þrjú, hin gamla mynd af titlinum, hin nýja og loks á sjálfu orðinu ,,Dýraverndarinn”. Við hvetjum þig til að kynna þér skráningu leyfa okkar á heimasíðu einkaleyfastofu.

Þú hefur rekið heimasíðu með sama nafni og notað merki tímaritsins og leitt þangað ýmislegt efni úr gömlum árgöngum þess og þannig gefið þá mynd að tímaritið sé á þínum vegum. Jafnframt hefur þú ritað greinar í nafni tímaritsins þar sem þú hefur nýtt þér nafn Dýraverndarans m.a. þér til framdráttar til kynningar á starfsemi þinni. Þetta er augljóslega andstætt hagsmunum og starfsemi Dýraverndarsambandsins og útgáfu þess, enda ert þú talsmaður hvorugs. Við teljum þetta brjóta í bága við lög um höfundarrétt og villandi markaðssetningar. Við höfum áður ritað þér bréf og beðið þig að láta af þessu og viljum freista þess að gefa þér kost á því á ný að hætta að fjalla um málefni dýravelferðar undir nafni tímaritsins. Verðir þú ekki við beiðni okkar erum við tilneydd til að leita lögformlegra leiða til að verja hagsmuni félagsins, þar til þetta verður leiðrétt.

Við myndum harma þá stöðu að vera knúin til þess að nýta fé og orku félagsins til að verja hagsmuni þess fyrir óheimilli notkun á nafni þess og velvild, en hjá því verður ekki komist ef ekki verður komið til móts við beiðni okkar. Við vonum að þú takir þá afstöðu að láta hagsmuni og sögu okkar gamla félags ganga fyrir og leggir þitt af mörkum til þess að félagið geti fremur einbeitt sér að starfi í þágu velferðar dýra.
Við óskum svara innan mánaðar og munum leita annað að þeim tíma liðnum.
Við óskum þér velfarnaðar í þínum störfum.

Virðingafyllst,
stjórn Dýraverndarsambands Íslands.

Undir bréfið skrifa allir stjórnarmenn DÍS.

Comments are closed.