 Verkefni nýrrar stjórnar hafa verið af ýmsum toga frá aðalfundi í ágúst. Fulltrúar stjórnar áttu fund með matvælaráðherra í september ásamt Samtökum um dýravelferð á Íslandi (S.D.Í), þar sem komið var á framfæri þeim málefnum sem stjórn taldi brýnust á þessu starfsári; búfjáreftirlit, blóðmerahald og hvalveiðar. DÍS hefur einnig átt fund með Ríkisendurskoðun og komið sjónarmiðum félagsins á framfæri varðandi eftirlit Matvælastofnunar (MAST) með velferð dýra í landinu. Unnið er að því að fá starfsmann í hálft starf enda verkefnin ærin. Stjórnarmenn sinna því starfi félagsins sem stendur. Unnið er að úttekt um rökstuddar aðfinnslur vegna búfjáreftirlits MAST. DÍS leitar til almennings varðandi reynslu af úrvinnslu og eftirliti MAST með velferð dýra og biður fólk sem er reiðubúið að veita upplýsingar að hafa samband á abending@dyravernd.is. Stefnt er að því að halda opið málþing um eftirlit með velferð dýra í febrúar næstkomandi. Hægt er að hafa samband við félagið símleiðis í síma 858 3044 á þriðjudögum og fimmtudögum frá kl 17:00-19:00, en minnum á netfang félagsins, dyravernd@dyravernd.is. Stjórn DÍS Comments are closed.
|