Málþing um auðgandi áhrif dýra á líf manna

mynd: Gregory Colbert.

Dýraverndarsamband Íslands stendur fyrir málþingi næstkomandi laugardag, 8. nóvember í húsnæði félagsins að Grensásvegi 12a (bakhús). Málþingið fjallar um jákvæð og auðgandi áhrif dýra á líf manna. Af hverju sækist maðurinn eftir návist og félagsskap dýra?

Iðulega er fjallað um dýr og málefni dýra annað hvort út frá sjónarmiði um hagnýtingu á þeim eða út frá sjónarmiðum um illa meðferð manna á dýrum. Vissulega þarf að fjalla um illa meðferð á dýrum og oft virðist baráttan fyrir velferð þeirra hafa ein yfirhöndina þegar rætt er um dýr. 
En það er önnur hlið á samskiptum manna og dýra sem sjaldnar er rædd, en er þó mikilvæg og á sér stað um allan heim, á öllum tímum. Sambýli manna og dýra, þar sem báðum líður vel – hvort sem um er að ræða selskapsdýr, villt dýr eða búfé – er ríkur þáttur í tilveru mannsins. 

Við ætlum að skoða þetta á málþinginu. Rannsóknir hafa sýnt að bein jákvæð áhrif dýra á heilsu manna eru ótvíræð, bæði líkamlega og andlega. Hvernig auðga dýrin líf okkar?

Málþingið hefst kl. 14:00 og stendur til kl. 16:00. Kaffiveitingar og líflegar umræður. 

Í pallborði verða:

Hallgerður Hauksdóttir formaður DÍS setur þingið og greinir frá ráðstefnu um málefni selskapsdýra í Brussel 2013.
Margrét Björk Sigurðardóttir líffræðingur
Kristján Oddsson bóndi að Neðra-Hálsi
Valgerður Valgeirsdóttir frá Dýrahjálp Íslands
Dagmar Vala Hjörleifsdóttir dýralæknir

Allir dýravinir eru hjartanlega velkomnir. 
Við vonumst til að sjá ykkur
Stjórn DÍS.

---