Lagabreytingatillögur og framboð til stjórnar

Fyrir aðalfund verða lagðar eftirfarandi framboð og lagabreytingatillögur, sem bárust félaginu: 
​
Hrefna Sigurjónsdóttir hefur gefið kost á sér sem meðstjórnandi til eins árs, er Liselotte Widing víkur úr stjórn eftir árs þjónustu. Þökkum við Liselotte kærlega hennar störf í þágu dýraverndar. Hrefna er dýraatferlisfræðngur og hefur mikinn áhuga á dýravernd. Myndin er af henni. 

Í kjöri í ár eru formaður, gjaldkeri og meðstjórnandi til tveggja ára. Sif Traustadóttir gjaldkeri til tveggja ára gefur kost á sér áfram í stöðu meðstjórnanda og Linda Karen Gunnarsdóttir meðstjórnandi til tveggja ára gefur kost á sér áfram í stöðu gjaldkera í hennar stað. Hallgerður Hauksdóttir gefur kost á sér til formennsku áfram til næstu tveggja ára. 


Stjórn DÍS leggur fram eftirfarandi lagabreytingatillögur.
Grænn texti er tillaga um viðbót og rauður texti fer út í staðin: 

TILLAGA EITT.
 
1. gr.
Heiti félagsskaparins er Dýraverndarfélag Íslands - Dýraverndarsamband Íslands og er varnarþing þess í Reykjavík.

Helstu rök:
Nafnabreyting er gerð með það að markmiði að nota fremur hið upprunalega nafn félagsins og í ríkara mæli. Gamla nafnið er enn mikið notað víða og veldur ruglingi að hafa það ekki með í heiti félagsins, betra er að hafa bæði nöfnin gild og stefna af því að afleggja ,,samband" úr nafni félagsins með tíð og tíma. Upprunalegt nafn félagsins er Dýraverndunarfélag Íslands og var notað í 55 ár en nafnabreytingar á sjötta og tíunda áratug síðustu aldar urðu vegna þess að reynt var að stofna til aðildafélaga eða undirdeilda. Gekk það aldrei vel. Við viljum hefja hið gamla nafn upp á ný og tengja betur við sögu félagsins um leið. Bæði nöfnin yrðu notuð jöfnum höndum fyrst í stað og jafnframt væri hið gamla nafn félagsins tryggt fyrir því að aðrir geti tekið það upp.
Nýrri orðmynd sleppir stöfunum ,,un" úr nafninu, til samræmis við nútíma orðfæri.
 
verður:
 
1. gr.
Heiti félagsskaparins er Dýraverndarfélag Íslands - Dýraverndarsamband Íslands og er varnarþing þess í Reykjavík.
 
TILLAGA TVÖ.
 
5. gr.
Reikningsár sambandsins er almanaksárið. Stjórn velur viðurkenndan fagaðila sem sér um  (löggiltan endurskoðanda sem sér um endurskoðun reikninga og) gerð ársreikninga sambandsins.

Helstu rök:
Endurskoðun er skyld samkvæmt lögum um ársreikninga (nr. 3/2006, 98.gr.) ef félag fer fram yfir tvö af eftirfarandi þremur atriðum: 1. eignir nema 200.000.000 kr., 2. rekstrartekjur nema 400.000.000 kr., 3. fjöldi ársverka á reikningsári er 50. Hér er aðallega miðað við atvinnurekstur, en ekki er hefðbundið að endurskoða þurfi ársreikninga hjá litlum félagasamtökum. Endurskoðun er enda mjög dýr og því hefðbundið að félög fái skoðunarmenn, oft félagsmenn, til að skoða og láta í ljósi álit á réttleika bókhalds og reikninga. Um hæfi skoðunarmanna fer eftir lögum um bókhald (nr 145/1994, 33.gr.)
Hér er miðað við að með orðalaginu ,,viðurkenndan fagaðila” sé átt við aðila sem hefur hlotið viðurkenningu sem bókari með réttindi til að gera upp lítil og meðalstór félög, eða aðila með meiri þekkingu, en ekki einskorðað við aðila með full endurskoðunarréttindi.
 
verður:
 
5. gr.
Reikningsár sambandsins er almanaksárið. Stjórn velur viðurkenndan fagaðila sem sér um gerð ársreikninga sambandsins.
 
 
TILLAGA ÞRJÚ.
 
9. gr.
(..)
Á aðalfundi skal stjórn kynna ársskýrslu þar sem gerð er grein fyrir störfum félagsins á liðnu ári, kynna tillögur um verkefni næsta árs og leggja fram (endur)skoðaða reikninga félagsins og undirritað álit skoðunarmanna til afgreiðslu. Kynni stjórn DÍS fyrirhuguð verkefni sem fela í sér veruleg fjárútlát þarf samþykki tveggja þriðju aðalfundargesta til þeirra verkefna.
 
Helstu rök;
Verja verður fjárhagslega hagsmuni félagsins í framtíðinni með því að slá varnagla sem takmarkar umboð stjórnar til að fara óvarlega með fé og sem skapar grundvöll til að sækja aftur það sem óvarlega hefur verið farið með, jafnvel með málssókn af hálfu félagsins. Stjórn DÍS hefur eftir sem áður umboð til daglegs reksturs og viðburðahalds, eðlilegrar kynningar og vinnu í þágu markmiða félagsins í samræmi við 2. grein laga félagsins, liðir a) til f).
Hér er einnig skerpt á því að álit skoðunarmanna eigi að liggja frammi við samþykktarferli á ársreikningum félagsins í samræmi við tillögu um breytingu á 5. grein.
 
verður:
 
9. gr.
(..)
Á aðalfundi skal stjórn kynna ársskýrslu þar sem gerð er grein fyrir störfum félagsins á liðnu ári, kynna tillögur um verkefni næsta árs og leggja fram skoðaða reikninga félagsins og álit skoðunarmanna til afgreiðslu. Kynni stjórn DÍS fyrirhuguð verkefni sem fela í sér veruleg fjárútlát þarf samþykki tveggja þriðju aðalfundargesta til þeirra verka.

---