Enn af óheimilli notkun á titlinum Dýraverndarinn

Dýraverndarsambandi Íslands barst svar við umleitan félagsins, vegna manns sem hefur notað einkaleyfavarinn titil tímaritsins okkar til að kynna sín eigin hugðarefni um dýravernd (sjá eldri frétt). Tímaritið var stofnað af félaginu og kom út í 69 ár á vegum félagsins og var hafin endurútgáfa á því árið 2012. Maðurinn er með heimasíðu og síðu á facebook á sínum vegum, undir nafni Dýraverndarans. Svar mannsins til DÍS hljóðar svo: 


,,Þessu er til að svara að ég mun halda uppi vörnum kom til málssóknar af ykkar hálfu enda eiga fullyrðingar og aðdróttanir ykkar um ávinning minn af þessari ófjárhagslegu útgáfustarfsemi ekki við nein rök að styðjast.
Þá hefur einkaleyfastofa ekki borið meinta skráningu undir mig sem notanda að þeim titlum sem vísað er í."

- Þess ber að geta að um raunverulega einkaleyfaskráningu er að ræða, en óljóst er hvað maðurinn á við með meintri skráningu. 

- Jafnframt barst í kjölfarið til félagsins svohljóðandi áskorun frá manninum:


Dýraverndarsamband Íslands hefur notað orðið Dýraverndarinn, sem titil á tímarit sambandsins undanfarin misseri. Fyrir nokkrum árum hófu undirritaður og samstarfsmenn hans í dýravernd notkun orðsins í léni og á samskiptamiðlinum facebook.

Þó svo, að notkun hvorugra aðila falli undir vörumerkjalög þá telur undirritaður það í hæsta máta óeðlilegt að Dýraverndarsambandið skuli taka upp á því að nýta sér orðið meðvitað um, að undirritaður og samstarfsmenn hans í dýravernd hófu notkun þess löngu áður en Dýraverndarsambandið tók upp á því að nota það líka.

Undirritaður hafði í fyrstu ákveðið að láta það óátalið, að Dýraverndarsambandið nýtti sér þetta orð. Ljóst er hins vegar, að mati undirritaðs og þeirra fylkingar dýraverndarsinna, sem að baki honum standa, að jafnvel þó Dýraverndarsamband Íslands sé vart sýnilegt í íslenskri dýravernd þá kann það valda ruglingi á meðal dýravina og trufla dýraverndarstarf þess hóps, sem undirritaður fer fyrir að Dýraverndarsamband Íslands noti þetta orð.

Langur vegur er frá, að sameinanlegir séu starfshættir og markmið stjórnar Dýraverndarsambandsins og þeirra, sem að baki útgáfu undirritaðs standa og engin vilji til þess í augnsýn af hálfu stjórnar Dýraverndarsambandsins, að mati okkar.

Því er hérmeð skorað á stjórn Dýraverndarsambandins, að láta af þessari notkun tafarlaust svo ekki þurfi að bregðast við henni með lögformlegum hætti.

Auk þess skorar undirritaður á meðstjórnendur, ritara og gjaldkera DÍ að krefjast þess af formanni DÍ að hann segi af sér. Það er leitun, að einstaklingi með jafn mikinn skort á leiðtogahæfileikum og pólitískum þokka og hjá formanni DÍ. Þetta er því miður umtalað."


- Það er ljóst að maðurinn ætlar að halda uppteknum hætti og nota heiti tímarits félagsins með villandi hætti til kynningar á sínu eigin efni. 

- Dýraverndarsambandið hefur þegar sent kvörtun vegna þessarar notkunar mannsins til Neytendastofu.

Stjórn DÍS.