Árangur og framfarir í þágu velferðar dýra

Eitt af hlutverkum DÍS er að að beita sér fyrir fræðslu og upplýsingamiðlun um góða meðferð dýra og hvetja skóla, félagasamtök og einstaklinga til að efla velferð þeirra. 


Stjórn DÍS hefur ákveðið að velja árlega úr þeim hópi einstaklinga, félagasamtaka eða lögaðila sem vinna að bættri velferð dýra í anda félagsins og styrkja þá viðleitni. Einnig velur stjórn DÍS dýravin sem hefur hefur unnið að aukinni dýravelferð með ótvíræðum hætti og í anda félagsins. Dýraverndarsambandið vill með þessu móti beita sér fyrir að styrkja og efla þá sem vinna að dýravelferð og einnig vekja athygli á og hvatningu til slíkrar vinnu.

____________________________________________________________________

Næsta laugardag, þann 18. apríl klukkan 14:00, verður haldinn atburður í húsnæði félagsins að Grensásvegi 12A (bakhús) þar sem Dýraverndarsambandið veitir þessar viðurkenningar fyrir störf í þágu velferðar dýra á Íslandi. 


Við vonum þú sjáir þér fært að mæta og taka þátt í þessum atburði. Kaffi og með því að athöfn lokinni. Hér hittast dýravinir og eiga saman ánægjulega stund.

____________________________________________________________________

Styrkveitingar ársins 2015:

1. Kisukot á Akureyri, þjónusta í þágu velferðar vergangs- og villikatta.

Kisukot var stofnað í janúar 2012 og hefur síðan þá starfað í þágu heimilislausra katta á Akureyri. Stjórn DÍS telur fólgna ótvíræða bætingu á velferð katta í starfi Kisukots og líkra félaga. Starfið miðar að því að leitast við að finna ný heimili fyrir ketti, umhverfisvenja þá, veita þeim læknishjálp, athvarf og atlæti – og einnig því að hjálpa villiköttum þar sem þeir halda til, m.a. með geldingu, mat og hlý ból. Fjárstyrkurinn fer að beiðni Kisukots til dýralæknastofu sem er í samstarfi við Kisukot og er upphæðin 70.000 krónur.

2. Tilraunarverkefni Ormsstaðabúsins og rannsóknarstöðvar Matís að sleppa alfarið geldingu grísa.

Svínabúið að Ormsstöðum hefur sýnt viðleitni til að marka þá stefnu að hætta alfarið geldingu grísa. Stjórn DÍS telur fólgna ótvíræða bætingu á velferð grísa í því að sleppa að gelda þá og hlífa þeim þannig við óþarfa sársauka og streitu. Með þessu má binda vonir við að Ísland bætist í hóp þeirra landa sem ekki láta gelda grísi og vill stjórn því DÍS styrkja þetta frumkvöðlastarf. Fjárstyrkurinn fer að beiðni Ormsstaðabúsins til Matís þar sem prófanir eru gerðar á afurðum ógeldra grísa og er upphæðin 70.000 krónur.

Dýraverndari ársins 2015:

Viðurkenning fyrir árangur við starf að dýravernd.

Sem dýraverndari ársins er valin Sigríður Björnsdóttir fyrir ötula vinnu í þágu velferðar hesta undanfarin ár. Hún hefur beitt sér fyrir almennri velferð hesta, m.a. með því að vinna gegn óhóflegri tannröspun og tannslípun hesta sem sýnt hefur verið fram á að sé óþörf og geti valdið þeim viðvarandi tannverk. Einnig hefur hún unnið að rannsóknum sem sýna fram á arfgengi sársaukafullrar liðakölkunar í afturfótum hesta (spatt), sem í kjölfarið hefur verið reynt að koma í veg fyrir við ræktun íslenska hestsins. Jafnframt hefur Sigríður sýnt fram á að notkun ákveðinna beislisméla valdi beinhimnubólgu með þrýstingi á kjálkabein hrossa og hafa þau mél nú verið bönnuð við keppni og sýningar á íslenskum hestum vegna dýravelferðarsjónarmiða.

Dýraverndarsambandið telur að vinna Sigríðar í þágu hesta hafi ótvírætt bætt velferð þeirra og framtíð og vill veita henni viðurkenningu fyrir hennar starf.

Sjáumst á laugardaginn!

Stjórn DÍS.

---