Samkvæmt áliti umboðsmanns hefur velferð dýra ekki nægilegt vægi til að hægt sé að rökstyðja frestun hvalveiða með nægilega skýrum hætti á grundvelli laga um hvalveiðar. Matvælaráðherra frestaði hvalveiðitímabili í júní sl. og tók þar með afstöðu með velferð dýra. Í ljósi skýrslu Matvælastofnunar, álits Fagráðs um velferð dýra og yfirlýsingu Dýralæknafélags Íslands bar ráðherra að bregðast við. Það stenst ekki nútímann ef lög eru ekki nógu skýr til að stjórnvöldum sé fært að grípa til viðeigandi ráðstafanna í þágu dýravelferðar. Þess vegna köllum við, undirrituð, eftir því að Alþingi breyti lögum á þann hátt að ráðherra hafi heimild til að grípa til viðeigandi ráðstafana komi í ljós að veiðarnar fara í bága við lög um velferð dýra. Lögin í landinu endurspegla siðferði okkar sem samfélags, til þess eru lögin gerð og hér er augljóslega misræmi milli siðferðislegra gilda meirihluta almennings og laga. Dýraverndarsamband Íslands Hvalavinir Landvernd Náttúruverndarsamtök Íslands Samtök grænkera á Íslandi Samtök um dýravelferð á Íslandi Ungir umhverfissinnar Dýraverndarsambandið hefur fengið staðfest að um 30 kindur séu innilokaðar í fjárhúsi í Grindavík nærri götunni Bakkalág. Einnig er sauðfé innilokað í fjárhúsi við Sjávarbraut og í fjárhúsum í Þórkötlustaðahverfi og hugsanlega víðar. Ekki er hægt að sækja dýrin við þær aðstæður sem nú eru í Grindavík. Engu að síður er nauðsynlegt að dýrunum sé hleypt út strax svo þau geti forðað sér úr þeim hættulegu aðstæðum sem nú eru á svæðinu. DÍS beinir því til almannavarna sem annarra ábyrgra aðila í þeim aðgerðum sem nú eru í Grindavík að reyna, ef þess gerist nokkur kostur, að koma þessum skepnum til bjargar. Stjórn Dýraverndarsambands Íslands Dýraverndarsamband Íslands (DÍS) lýsir vonbrigðum sínum með álit umboðsmanns Alþingis þess efnis að skort hafi lagaheimild til að fresta veiðitímabili á langreyðum sumarið 2023. Í álitinu eru lög um velferð dýra frá 2013 víkjandi en tekið fram að ekki hafi verið nægilega skýr stoð í lögum um hvalveiðar frá 1949 fyrir ákvörðun matvælaráðherra um frestun veiða. Þannig er í álitinu vægi 75 ára úreltra hvalveiðilaga metið mun þyngra en 11 ára laga um dýravelferð. DÍS telur það vera mikið áhyggjuefni að dýravelferð er sett til hliðar og hvetur ríkisstjórn og Alþingi til þess að ganga án tafar í að endurskoða löggjöf þannig að dýr njóti vafans, en að atvinnuréttur sé ekki látinn ganga framar því að uppfylla lög um dýravelferð. Í tilviki Hvals hf var búið að sýna fram á veiðarnar væru ekki í samræmi við lög um dýravelferð og því bar ráðherra að bregðast við. Þetta álit umboðsmanns leiðir í ljós nauðsyn á endurskoðun og breytingu laga umfram allt annað. Stjórn Dýraverndarsambands Íslands Ríkisendurskoðun hefur birt skýrslu um eftirlit Matvælastofnunar (MAST) með velferð búfjár. Niðurstaða skýrslunnar er í grundvallaratriðum í takti við þá úttekt sem DÍS lét vinna veturinn 2022-2023 og kynnt var í mars sl., ,,Bætt dýravelferð’’. Fram kemur í skýrslu DÍS að gefnir séu ítrekaðir frestir til betrumbóta og dýrin því látin þjást sem er andstætt lögum um velferð dýra. Í skýrslu Ríkisendurskoðunar segir eftirfarandi: ,,MAST þarf að leggja aukna áherslu á að stjórnsýsluleg framkvæmd verði ekki á kostnað velferðar dýra.” Að mati DÍS er bráðnauðsynlegt að fjölga dýraeftirlitsmönnum og að eftirlitstíðni verði aukin til að eftirlitið virki á fyrirbyggjandi hátt og veiti aðhald. Of langur tími líður milli eftirlitsheimsókna almennt í búfjárhaldi og auka þarf sömuleiðis eftirlit með þauleldi. Í skýrslu DÍS er jafnframt bent á að málshraði þarf að vera mun meiri og dýrin eigi að njóta vafans sem er sama niðurstaða og í skýrslu Ríkisendurskoðunar. Að mati DÍS þurfi að færa eftirlit með velferð dýra frá MAST og koma eftirlitinu fyrir í sérstakri Dýravelferðarstofu, til að styrkja dýravelferðaráherslur og koma í veg fyrir þá hagsmunaárekstra sem felast í því að hafa dýravelferð og matvælaeftirlit undir sama hatti. Það sést einna best á því að halaklippingar á grísum eru enn framkvæmdar hér á landi í stórum stíl af hálfu svínabænda og MAST upplýst um það - þó slíkt sé bannað með lögum - en stofnunin bregst ekki við. Það er von DÍS að þessi úttekt Ríkisendurskoðunar verði, ásamt með úttekt DÍS fyrr á árinu, til þess að nauðsynlegar breytingar verði gerðar í þágu dýravelferðar. Stjórn DÍS |