Aðalfundur Dýraverndarsambandsins var haldinn í Norræna húsinu laugardaginn 10. mars síðastliðinn. Margt gagnlegt var þar rætt, ný stjórn félagsins kjörin, samþykkt voru endurskoðuð lög fyrir starfsemi félagsins og einnig var skýrsla stjórnar fyrir árin 2010-2012 kynnt, en skýrsluna er að finna hér á síðunni og hvetjum við fólk til að kynna sér hana.

Mæting var afar góð, en vel á annað hundrað manns mættu og sátu margir allan fundinn. Skráðir félagar sem mættu og fengu kjörseðil voru 134, sem raunar er rétt um helmingur félagsmanna og er það ánægjulegt.

Ólafi Dýrmundssyni, sem stóð formannsvaktina um árabil voru færð blóm og þakkir fyrir óeigingjarnt starf í þágu dýra.

Stjórn Dýraverndarsambandsins fagnar þeim áhuga sem finna má í vaxandi mæli um málefni dýra, bæði með aukinni þátttöku í félagasamtökum eins og okkar og einnig almennt í samfélaginu. 

Að vera dýravinur er alls óháð stétt eða stöðu manna, okkur er að finna alls staðar á landinu, í öllum starfstéttum og stjórnmálaflokkum, í dreifbýli jafnt sem þéttbýli, enda er flestum mönnum í blóð borið að vilja verja þá sem minni máttar eru, svo sem dýrin, en þau fara iðulega fara halloka ef maðurinn beitir sér gegn þeim.

Hin nýja stjórn mun halda áfram með það góða starf sem lagður hefur verið grunnur að og vill efla og kynna félagið sem best. Við hvetjum þá sem velviljaðir eru málefnum dýra til að skrá sig í félagið og styrkja þannig vægi DÍ og rödd í íslensku samfélagi. 

Dýraverndarsamband Íslands hvílir á gömlum grunni enda brátt aldar gamalt. Svo sem þroska þess hæfir er félagið í framsögn ætíð hófstillt og málefnalegt, en jafnframt ötult og beint í baki. Við látum ekki deigan síga og vissulega eru næg verkefni framundan.

Fundargerð aðalfundarins verður birt hér um leið og ritari hefur lokið störfum.

Aðalfundur Dýraverndarsambands Íslands fór vel fram í Norræna húsinu í dag og fjölmenntu félagar á fundinn.

Sif Traustadóttir fékk afgerandi kosningu sem formaður sambandsins til tveggja ára.

Hér fyrir neðan má sjá niðurstöður úr kosningum til stjórnar DÍ.

Niðurstöður úr kosningum til stjórnar Dýraverndarsambands Íslands 2012 

Formaður til tveggja ára:  Sif Traustadóttir

Meðstjórnandi til tveggja ára:   Íris Lilja Ragnarsdóttir

Meðstjórnandi til eins árs:  Sigursteinn Másson

Meðstjórnandi til eins árs:  Klara Helgadóttir

Ritari til eins árs:  Hallgerður Hauksdóttir

Skoðunarmaður reikninga til tveggja ára:    Helgi Hákon Jónsson

Skoðunarmaður reikninga til eins árs:    Róbert H. Helgason 

Gjaldkeri til tveggja ára:   Margrét Björk Sigurðardóttir

Hér má finna ársskýrslu Dýraverndarsambands Íslands árið 2012:

Ársskýrsla DÍ 2012

Hér fyrir neðan má finna framboðskynningar frambjóðenda til kosningar í stjórn Dýraverndarsambands Íslands sem fram fer á aðalfundi þann 10. mars nk. 

Framboðskynningar

Stjórn Dýraverndarsambands Íslands samþykkti á stjórnarfundi 5. mars 2012 að skora á íslensk stjórnvöld að gera allan Faxaflóa og hvala-skoðunarsvæði við Norðurland að sérstökum verndarsvæðum fyrir hvali. 

Minnt er á hið mikla þjóðhagslega gildi hvalaskoðunar sem liðar í umhverfistengdri ferðaþjónustu, samanborið við hvalveiðar. 

Þá eru stjórnvöld hvött til þess að láta gera óháðar, vísindalegar rannsóknir á hvalveiðiaðferðum með hliðsjón af velferð dýranna.

Aðalfundur Dýraverndarsambands Íslands verður haldinn í Norræna Húsinu laugardaginn 10. mars 2012 kl. 11:00

FRAMBOÐSFRESTUR:  Miðvikudagur 7. mars 2012.  
Tekið við framboðskynningum sbr. aðalfundarboð dags. 22. febrúar sl.

DAGSKRÁ AÐALFUNDAR:

1)  Fundur settur og embættismenn kjörnir.
2)  Greint frá starfseminni 2010-2012 (kynning á vefsíðunni skömmu fyrir fundinn).
3)  Lagðir fram reikningar fyrir  árin 2010 og 2011 og þeir bornir undir atkvæði.
4)  Félagsgjald - tillaga frá stjórn lögð fram.
4)  Drög að nýjum lögum kynnt og þau borin undir atkvæði.
5)  Kosning stjórnar (átta stöður).
6)  Önnur mál.
7)  Fundi slitið.

Athugið að aðeins skráðir félagar eru kjörgengir og hafa rétt til fundarsetu og atkvæðagreiðslu á aðalfundi.
Miðað verður við félagaskrá eins og hún stendur 9. mars.  

Þeir sem óska eftir að gerast félagar fyrir aðalfund skulu senda tölvupóst í www.dyravernd.is eða gefa sig fram í símsvara/faxi Dýraverndarsambands Íslands 552-3044, sem allra fyrst, til þess að komast inn á félagaskrána í tæka tíð.

Ef þörf krefur verða frekari upplýsingar birtar á vefsíðunni.

Stjórnin 

Aðalfundur Dýraverndarsambands Íslands 2012 verður haldinn í Norræna húsinu í Vatnsmýri, Reykjavík, 
laugardaginn 10. mars n.k. kl. 11 f.h.

Auk venjulegra fundarstarfa verða lögð fram til samþykktar drög að nýjum lögum fyrir sambandið sem stjórnin hefur undirbúið í samræmi við ályktun síðasta aðalfundar. Lagadrögin eru nú í umsagnarferli hjá félögum. 

Óskir um breytingar sem kunna að berast á aðalfundinum skulu lagðar þar fram skriflega sem breytingartillögur við einstakar greinar. Fundardagskrá verður kynnt nánar um mánaðarmótin á www.dyravernd.is og í 2. tbl. vefritsins Dýraverndaranum.

Á meðal aðalfundarstarfanna verður stjórnarkjör og verður kosið um allar stöður sem hér segir:

Formaður til tveggja ára
Gjaldkeri til tveggja ára
Ritari til eins árs
Meðstjórnandi til tveggja ára
Meðstjórnandi til eins árs
Meðstjórnandi til eins árs
Skoðunarmaður reikninga til eins árs
Skoðunarmaður reikninga til tveggja ára

Þeim sem vilja bjóða sig fram til kjörs í framangreindar átta stöður, er hér velkomið að senda sem fyrst framboðstilkynningu á dyravernd@dyravernd.is með mynd og um 200 orða texta. Tilgreint verði í hvaða stöðu/stöður viðkomandi gefi kost á sér.

Stjórnin hvetur félaga til að nýta sér þessa opnu og lýðræðislegu leið til að hafa áhrif á stjórn sambandsins.

Með bestu kveðjum f.h. stjórnar Dýraverndarsambands Íslands,
Ólafur Dýrmundsson

Dýraverndarsamband Íslands hefur nú fengið nýja og betri vefsíðu. 

Vefsíðan er enn í vinnslu og mun frekara efni birtast innan tíðar, en ætlunin er að hafa vefsíðuna virka og setja reglulega inn
nýtt efni og fréttir.

Fréttabréfið Dýraverndarinn kemur nú út á tveggja mánaða fresti.  Allir félagar fá senda tilkynningu með vefpósti þegar Dýraverndarinn hefur komið út, en hann er á rafrænu formi um sinn. 

Fyrsta tölublaðið kom út í dag og er vefslóð hér til hliðar þar sem lesa má blaðið.

Málþingið sem Dýraverndarsamband Íslands og Norræna húsið stóðu fyrir 25.október sl., tókst prýðilega. 
Rúmlega 40 manns sátu þingið, bæði félagar og annað áhugafólk um málefnið. 

Öll framsöguerindin sem kynnt voru í bréflegri dagskrárkynningu, í viðtölum á Ísland í býtið á Bylgjunni, í Morgunútvarpi Rásar tvö og víðar, voru flutt með glæsibrag. Pallborðsumræður sem Guðfríður Lilja Grétarsdóttir alþingismaður stýrði með afbrigðum vel, voru málefnalegar og uppbyggjandi. Aðstoðarmaður Jóns Bjarnasonar sjávarútvegs- og landbúnaðarráðherra, Árni Snæbjörnsson, ávarpaði málþingið og Kristinn Hugason, sem mest ráðuneytismanna hefur unnið að undirbúningi nýs lagafrumvarps um dýravelferð, svaraði öllum spurningum greiðlega í pallborðsumræðunum. 

Greinilega var mjög tímabært að efna til þessarar umræðu en nú styttist í frágang frumvarpsins sem verður lagt fyrir þingflokkana um mánaðamótin og þaðan fer það væntanlega til Alþingis um áramót. Vonast er eftir að þar verði það afgreitt vorið 2012 þannig að reikna má með frekari fundhöldum um málið þegar þingnefnd fer að vinna í því. 

Margs konar lagabætur sem Dýraverndarsamband Íslands og Dýraverndarráð lögðu til koma vonandi fram í væntanlegu frumvarpi  og munum við fylgjast grannt með gangi mála sem fyrr því að um mikið hagsmunamál er að ræða.

Áformað er að birta öll erindin hér á heimasíðunni.