Til félaga í DÍS vegna aðalfundar

Félagar hafa nú fengið sent  fundarboð og dagskrá aðalfundar Dýraverndarsambands Íslands 2018, en fundarboðið var einnig birt hér á forsíðu og facebooksíðu félagsins.  Því miður var misritun í tölvupóstinum þar sem tímafrestur til að skila inn framboði til stjórnarstarfa var  sagður fyrir  þriðjudaginn 22. apríl, en á auðvitað að vera þriðjudaginn 22. maí (22. apríl var sunnudagur). Biðjumst við velvirðingar á þessari  villu,   en   textinn var lagfærður í auglýsingunni hér á heimasíðunni samdægurs. 

Stjórn DÍS hefur unnið að undirbúningi þess að ráða öflugan starfsmann fyrir félagið til að geta unnið betur og markvissar að málefnum dýra. Meðal annars höfum við hafið samstarf við Miðlun um að safna föstum styrktaraðilum til að kosta slíkan starfsmann en félagsgjöld okkar gætu alls ekki staðið undir slíku. Það var leitað til félaga DÍS um styrktaraðild og kunnum við ykkur bestu þakkir sem tókuð vel í það. Styrktarféagar fá ekki kröfu um félagsgjald senda í heimabanka, enda teljast félagsgjöld félaga innifalin í styrktaraðild.

Við viljum biðja ykkur að vekja athygli dýravina á styrktaraðild, því okkur sárvantar að hafa á okkar vegum öflugan starfsmann til að geta fylgt málum vel eftir. Styrktaraðild getur verið með eða án félagsaðildar, allt eftir því hvað fólk óskar. 

Á árinu seldi félagið helming húsnæðis síns að Grensásvegi 12A og var hluti af samþykktu kauptilboði að kaupendur gengju þannig frá húsnæðinu að það væri tilbúið til notkunar. Kaupendur hafa staðið við það og DÍS á áfram þann hluta húsnæðisins þar sem salurinn var. Hefur verið sett upp ágætis salernisaðstaða og eldhúskrókur og við hlökkum til að sýna ykkur þetta sem mætið á aðalfund. Félagið stendur sterkara eftir og er betur í stakk búið til að ráða starfsmann og vinna að dýravernd til framtíðar. 

Nánar verður fjallað um verkefni ársins í árskýrslu félagsins á aðalfundinum. 
Ef þú kemst ekki á aðalfund en vilt vita hverju við höfum unnið að þá er sjálfsagt mál að senda þér árskýrsluna eftir aðalfundinn. Láttu okkur bara vita. 

Stjórn DÍS