Gleðilegt nýtt ár dýravinir um allt land!

Töfrar íss og íslenskt vatn. Eilífsdalur, Kjós.

Dýraverndarsamband Íslands er hundrað ára á þessu ári, sem er fagnaðarefni.

 Á sama tíma og Dýraverndarsambandið var stofnað fyrir hundrað árum voru fyrstu heildarlögin um dýravernd samþykkt á Alþingi - þar fóru menn fyrir skjöldu, sem einnig störfuðu í Dýraverndarsambandinu.

Á þessu ári taka gildi ný dýravelferðarlög sem samþykkt voru á Alþingi í fyrra. Það er skemmtileg tilviljum að starfandi formaður DÍS, Sif Traustadóttir, sat í nefndinni sem skrifaði nýju lögin og þrýsti raunar á í upphafi, að ný lög yrðu skrifuð. 

Þannig helst sú tenging sem til varð í upphafi fyrir hundrað árum og eitt af markmiðum félagsins er að fylgja eftir að góð löggjöf sé fyrir hendi í málefnum dýra. Við höfum enda fylgt lögunum vel eftir, sérstaklega má nefna það að gelda grísi ekki án þess að deyfing væri notuð. Aftur var það raunar Sif sem fyrst vakti athygli á því máli, löngu áður en hún tók til starfa í DÍS og kom í ljós að almenningur var alls ekki upplýstur um þetta mál almennt. 

Einnig gættum við vel að ýmsu fleiru, þar fer fyrir því að í fyrsta sinn er nú skilgreint með lagabókstaf að dýr eru skyni gæddar verur. Því miður var ekki hægt að sporna við því að lögleidd væri drekking sem aflífunaraðferð á einni dýrategund; það er grimmleg aðferð til að drepa dýr og raunar er það svo að það varðar við lög að aflífa hvaða dýr sem er - annað - með slíkri aðferð; en minkurinn er uppáhald fárra, og engu líkara en að þar með hafi hann ekki sama taugkerfi, sársaukaskyn eða öndunarfæri og önnur spendýr... 

En við látum ekki deigan síga og gerum þá kröfu að öll dýr njóti verndar laganna. Hvort sem þau eru vinsæl eða ekki.

Margt hefur breyst í málefnum dýra á hundrað árum, bæði til hins betra og verra. Verksmiðjubúskapur með dýr er hið stærsta mein sem stungið hefur sér niður á Íslandi, það þekktist ekki hér áður. Hefðbundinn fjölskyldubúskapur, þar sem bóndinn þekkir hvert sitt dýr og býr að búi sínu – og hefur áhuga á að sinna starfi sínu, er ekki hið sama og þegar menn stofna ,,bú” af ítrustu stærðargráðu og ráða fólk til að vinna þar, með hagnað einan að leiðarljósi. Það sér hver maður hver munurinn getur verið á þessu tvennu hvað velferð dýra varðar. 

Á síðasta ári festi Dýraverndarsambandið kaup á húsnæði við Grensásveg í Reykjavík og vinnum í því að koma formlega upp skrifstofu með starfsmanni. Nú þegar er opið þar alla mánudaga kl. 13-18 og einnig fastir símatímar. Okkur langar til að húsið verði miðstöð dýravina á Íslandi, en öll uppbygging starfs er langhlaup. DÍS hóf einnig endurútgáfu Dýraverndarans, hins gamla tímarits félagsins, sem kom út í 69 ár allt framá níunda áratuginn. Blaðið fá allir félagar í DÍS sent heim til sín, og allir dýravinir eru hvattir til að senda greinar í blaðið. 

Í haust og vetur hefur Dýraverndarsambandið tekið formlega þátt í mótun reglugerða um aðbúnað dýra, sem taka eiga gildi í kjölfar nýju laganna. Það er talsverð vinna og margt sem huga þarf að. 

Við vonum að sem flestir dýravinir vilji gerast félagar í DÍS og ljá félaginu þannig sterka og breiða rödd fyrir hönd dýranna – því DÍS er félag allra dýravina á Íslandi – hófstillt og traust, en fast á málum sínum.
Gakktu til liðs við okkur á nýju ári!

DÍS

---