Flugeldar um áramótin og dýrin - bæði til sveita og bæja

Dýravinur hafði samband við DÍS og vildi koma á framfæri athugasemd um að dýrin geta goldið þess illa að við notum flugelda til að fagna nýju ári. 

Hún sagði m.a: ,,Ástæða þess að ég sendi þennan póst er flugeldaárátta landans, einkum um áramótin... mikill fjöldi hesta er enn í haga og flugeldar eru eitthvað sem þeir ekki þekkja, þeir verða mjög óttaslegnir við skotin. Margoft hefur það gerst að hestar hafi hlaupið á girðingar, farið niður kletta, skurði, komist í sjálfheldu, alloft ýmist slasast eða dáið. Þá er í raun tímaspursmál hvenær skelfdir hestar verði fólki einnig að fjörtjóni". 

Þetta er þörf ábending, dýrin verða að njóta réttar til sæmandi aðstæðna jafnt úti sem inni. Enginn siðaður maður vill valda slysum á dýrum eða þjáningu þeirra.

Mörg selskapsdýr á heimilum landsmanna líða einnig fyrir flugeldaskotin um áramótin. Þeir sem halda dýr heima þurfa að gæta að því. 

Gott er að hafa eitt herbergi með vel fyrir alla glugga dregið þannig að engir blossar sjáist og hafa gott útvarp í gangi, helst með umræðuþætti þar sem raddir manna spjalla saman eins og ekkert sé. Þá getur dýrið leita skjóls þar inni. 

Dýr leita staðfestingar hjá manninum á því hvort hætta sé á ferðum og við ættum því sjálf að leitast við að vera sem rólegust eins og það sé ekkert sérstakt á seyði þótt allt sé í hvellum allt um kring. Því rólegri sem við erum sjálf, því öruggari geta dýrin okkar verið með sig. Þetta getur hljómað skrítlega, en það er verra að vera stöðugt að hugga og róa dýrið, heldur en að láta sem ekkert sé... en vera auðvitað samt til staðar og gæta vel að því svo lítið beri á. 

Tökum tillit til dýranna. 

Gleðilegt nýtt ár kæru dýravinir um allt land, 
DÍS.

---