Vel heppnað málþing um dýravelferðarlöggjöfina

Málþingið sem Dýraverndarsamband Íslands og Norræna húsið stóðu fyrir 25.október sl., tókst prýðilega. 
Rúmlega 40 manns sátu þingið, bæði félagar og annað áhugafólk um málefnið. 

Öll framsöguerindin sem kynnt voru í bréflegri dagskrárkynningu, í viðtölum á Ísland í býtið á Bylgjunni, í Morgunútvarpi Rásar tvö og víðar, voru flutt með glæsibrag. Pallborðsumræður sem Guðfríður Lilja Grétarsdóttir alþingismaður stýrði með afbrigðum vel, voru málefnalegar og uppbyggjandi. Aðstoðarmaður Jóns Bjarnasonar sjávarútvegs- og landbúnaðarráðherra, Árni Snæbjörnsson, ávarpaði málþingið og Kristinn Hugason, sem mest ráðuneytismanna hefur unnið að undirbúningi nýs lagafrumvarps um dýravelferð, svaraði öllum spurningum greiðlega í pallborðsumræðunum. 

Greinilega var mjög tímabært að efna til þessarar umræðu en nú styttist í frágang frumvarpsins sem verður lagt fyrir þingflokkana um mánaðamótin og þaðan fer það væntanlega til Alþingis um áramót. Vonast er eftir að þar verði það afgreitt vorið 2012 þannig að reikna má með frekari fundhöldum um málið þegar þingnefnd fer að vinna í því. 

Margs konar lagabætur sem Dýraverndarsamband Íslands og Dýraverndarráð lögðu til koma vonandi fram í væntanlegu frumvarpi  og munum við fylgjast grannt með gangi mála sem fyrr því að um mikið hagsmunamál er að ræða.

Áformað er að birta öll erindin hér á heimasíðunni.