Aðalfundur Dýraverndarsambands Íslands

Aðalfundur DÍS var haldinn 16. maí. Listi tuttugu og níu nýrra félaga var samþykktur, sem jafngildir því að nýr félagi hafi gengið í félagið á tólf daga fresti allt síðasta ár. Við bjóðum þá hjartanlega velkomna í Dýraverndarsambandið. 

Aðalfundurinn gaf út tvær ályktanir: 

Ályktun aðalfundar Dýraverndarsambands Íslands vegna verkfalls dýralækna í matvælaeftirliti.

Lögum samkvæmt bera dýralæknar og bændur meginábyrgð á að tryggja velferð búfjár og ríkisvaldinu ber að tryggja að lögunum sé fylgt. Dýraverndarsamband Ísland tekur ekki afstöðu gagnvart málstað eða hagsmunum dýralækna, bænda né ríkisvaldsins við núverandi aðstæður, en telur að velferð og hagsmunir dýra séu að verða undir vegna þeirrar stöðu sem er uppi. 
DÍS telur því nauðsynlegt að án nokkurra tafa verði fundin leið óháð þeim ágreiningi sem uppi er sem tryggir velferð búfjár.  Ef ágreiningsaðilar geta ekki komist að slíku samkomulagi er það að lokum á ábyrgð ríkisvaldsins að framfylgja lögum 55/2013 um dyravernd, með hverjum þeim ráðum sem duga.

Ályktun Dýraverndarsambands Íslands er ákall til stjórnvalda um að taka til varna fyrir hönd dýra sem hér líða fyrir átök manna.

Til samþykktar á aðalfundi dags. 16. maí 2015

Atkvæði greitt um ályktunina: samþykkt einhljóða.


Ályktun aðalfundar Dýraverndarsambands Íslands vegna stefnu Öryrkjabandalags Íslands gagnvart gæludýrum í leiguhúsnæði samtakanna.

Samkvæmt heimasíðu ÖBÍ er markmið samtakanna að vinna að samfélagslegu réttlæti og bættum lífsgæðum og kjörum óháð líkamlegu eða andlegu atgervi einstaklinga. Gildi ÖBÍ eru þátttaka, jafnræði og ábyrgð. Samkvæmt samningi Sameinuðu þjóðanna um réttindi fatlaðs fólk er í 19. grein viðurkenndur jafn réttur þeirra til að lifa í samfélaginu og til að eiga valkosti til jafns við aðra.

Í rannsókn sem unnin var af MMR í apríl 2015 kom fram að gæludýr eru á 4 af hverjum 10 heimilum landsmanna. Margsýnt hefur verið fram á bætandi áhrif gæludýra á andlega og líkamlega heilsu manna.
Aðalfundur Dýraverndarsambands Íslands skorar á ÖBÍ að finna leiðir til að leyfa gæludýrahald í húsum samtakanna með eðlilegum húsreglum og almennum viðmiðum, en ella fari ÖBÍ gegn markmiðum sínum og gildum. Við teljum að ef fólk sem býr í fjölbýlishúsum á Íslandi getur almennt fundið leiðir til að lifa með gæludýrum nágranna sinna, hljóti ÖBÍ að miða einnig við það í sínu leiguhúsnæði.
Við minnum á að margir þeir sem búa í skjóli ÖBÍ eiga þess ekki kost að flytja sökum fötlunar sinnar og fyrir þetta fólk eru það afarkostir að geta ekki haft sín gæludýr.

Við skorum á ÖBÍ að standa vörð um sín gildi og færa húsreglur til nútímahátta.


Til samþykktar á aðalfundi dags 16. maí 2015

Atkvæði greitt um ályktunina: samþykkt einhljóða.