Öll dýr hvort sem þau eru villt eða undir manna höndum eru undir áhrifavaldi mannsins eins og málum er skipað í dag.

Grundvallarstefna Dýraverndarsambands Íslands er að stuðla að velferð dýra á Íslandi eftir bestu vitneskju um eðlislægt atferli og þarfir þeirra. Hlutverk dýra sem menn halda eru misjöfn eftir því hvort um er að ræða gæludýr, búfé, keppnisdýr, sýningardýr o.s.frv. og dýr eru haldin á mismunandi máta.

Miðað við fyrirliggjandi forsendur teljum við best að beita raunhæfri nálgun við allt dýrahald til að ná því markmiði að bæta aðbúnað og meðferð dýra, svo þau séu haldin þannig að þau eigi góða ævi. 

​Við vísum þar í réttindin fimm sem lágmarksviðmið, en þau eru tilgreind í 1. grein laga um velferð dýra 55/2013 og má sjá hér fyrir neðan.   Fagleg vinnubrögð við aflífun er hluti af vönduðu dýrahaldi.

​Nauðsynlegt er að horfast í augu við og afleggja dýrahald, þegar ekki er unnt að halda dýr þannig að þörfum þeirra verði mætt. Einkunnarorð DÍS eru tillitsemi, ábyrgð og virðing og er unnið samkvæmt þeim.

​Félagið vinnur að því að ná árangri við bætta dýravelferð í samvinnu við alla þá aðila sem að dýrum koma.
Við tökum einungis afstöðu til dýrahalds á grundvelli velferðar dýranna.

Dýraverndarsamband Íslands. 

Lög um velferð dýra
 2013 nr. 55
 1. gr.  Markmið. 
 Markmið laga þessara er að stuðla að velferð dýra, þ.e. að þau séu laus við vanlíðan, hungur og þorsta, ótta og þjáningu, sársauka, meiðsli og sjúkdóma, í ljósi þess að dýr eru skyni gæddar verur. Enn fremur er það markmið laganna að þau geti sýnt sitt eðlilega atferli eins og frekast er unnt. 

Lögin má finna   hér